Waan Daalay, Laakiin Maxaa I Daalshay?

Mararka qaar waxaan dareemeynaa daal, laakiin ma garanayno waxa na daaliyay. Maalin dhan wax badan ma qaban, haddana marka habeenku yimaado waxaan dareemeynaa sidii qof safar dheer ka yimid. Jidhku wuu fadhiyaa, laakiin maskaxdu ma nasanayso. Qalbigu wuu aamusan yahay, laakiin gudaha waxaa ka socda wax aynaan xitaa erayo u heli karin.

Waxaan dhahnaa, “Waan daalay,” laakiin haddii nala weydiiyo waxa ku daaliyay, jawaab cad ma hayno.

Waxaa laga yaabaa inaanan ka daalin shaqada. Waxaa laga yaabaa inaan ka daalnay fikirka badan, waxyaabaha aan qarsanay, dadka aan isku dayeyno inaan ka farxino, iyo nolosha aan maalin kasta iska dhahno “wax walba way hagaagi doonaan,” iyadoo gudaha aynu ognahay inaanan sidaas u hubin.

Mararka qaar waxa na daaliya ma aha waxa dhacay maanta, ee waa waxyaabo badan oo muddo dheer gudaha inaga jiray.

Waxaad noqon kartaa qof dadka la qosla, dadka la sheekeysta, sawirro qurux badan soo dhigta, haddana marka aad kaligaa qolkaa gasho aad dareento madhnaan aanad sharxi karin.

Qofna kuma weydiinayo waxa kaa dhex socda, sababtoo ah dadka waxay arkaan wajigaaga, ma arkaan dagaalka gudahaaga.

Waxaan mararka qaar isku daynaa inaan nafteena ku mashquulino wax walba. Telefoon, saaxiibo, shaqo, waxbarasho, socod, iyo hadal badan. Laakiin marka wax walba aamusaan, waxaan mar kale la kulannaa nafteena.

Halkaas ayaynu ogaanaynaa in dhibku uusan ahayn inaan wax badan qabanaynay, balse laga yaabo inaan muddo dheer ka cararaynay wax aan u baahanahay inaan wajahno.

Waxaa laga yaabaa inaad ka murugaysan tahay wax aanad weli aqbalin.

Waxaa laga yaabaa inaad ka niyad jabtay qof aad wax badan ka filaysay.

Waxaa laga yaabaa inaad naftaada la barbar dhigto dad aad u malaynayso inay nolosha kaa horreeyaan.

Waxaa laga yaabaa inaad 22 jir tahay, laakiin aad dareemeyso inaad noloshaada wax badan ka daahday. Dad aad isku da’ tihiin waxaad arkeysaa iyagoo shaqo helay, guryo dhisanaya, guursanaya, safaraya, ama noloshooda meel gaarsiinaya, adiguna waxaad is weydiinaysaa: “Anigu xaggee ayaan marayaa?”

Laakiin noloshu ma aha tartan qof walba isku mar lagu bilaabay.

Qaar waxay heleen fursado aad adigu weli sugayso. Qaar waxay heleen taageero aadan haysan. Qaar waxay heleen jid fudud, halka adigu aad waddo dheer ku jirto.

Sidaas darteed, ha isku xukumin adigoo noloshaada ku cabbiraya qaybta ugu quruxda badan ee dadka kale.

Mararka qaar waxaan u baahanahay inaan nafteena siino fasax aan ku dhahno: “Maanta ma fiicni, waana caadi.”

Uma baahnid inaad mar walba xoog badan tahay.

Uma baahnid inaad mar walba dadka tusiso inaad wax walba awooddo.

Uma baahnid inaad jawaab u hayso su’aal kasta oo noloshu ku weydiiso.

Mararka qaar waxa ugu caafimaad badan waa inaad yara joogsato, neefsato, naftaada dhageysato, oo aad fahanto waxa dhab ahaan ku haya.

Haddii aad dareemeyso madhnaan, ha isku dayin inaad si degdeg ah wax walba ugu buuxiso. Mararka qaar madhnaantu waxay kuu sheegaysaa in qayb kaa mid ah ay u baahan tahay daryeel, nasasho, jacayl, ama isbeddel.

Noloshu mar walba ma laha jawaab degdeg ah.

Mararka qaar waxaad u baahan tahay oo keliya inaad sii socoto, adigoo aan weli garanayn halka aad ku dambayn doonto.

Maalin ayaad dib u eegi doontaa wakhtigan adag, waxaadna fahmi doontaa in xilliga aad u malaynaysay inaad luminayso uu ahaa xilligii aad si tartiib ah naftaada dib ugu baranaysay.

Markaa haddii maanta aad daalan tahay adigoon garan sababta, naftaada ha ku adkaan.

Nasasho qaado.

Aamusnaanta ha ka cararin.

Naftaada dhageyso.

Wax kasta oo aad dareemeyso ma aha daciifnimo. Mararka qaar waa fariin ka timid gudahaaga oo kuu sheegaysa in qofka aad muddo dheer dadka kale u ahayd uu isaguna u baahan yahay in la daryeelo.

Uukow Media